德國西南地區聯賽 第十六週 FK Pirmasens - SV Elversberg Sportpark Husterhöhe 賽果： 0:1 (0:1) 入場人數： 961 (200 Gäste)
星期六作客 FK Pirmasens (我成日口口快叫左佢做 Parmesan），車程一個鐘內就到，球場係高速公路隔離，離遠就已經可以見到球場既射燈。
前一晚大家成日幫其中一位朋友慶生，有幾個飲左好多連枱都打爛埋，以為佢地第二日會起唔到身，但估唔到個個都好精神。落住雨凍冰冰都無損大家睇波既心情。
FKP 同 Elv 死敵 Homburg 係朋友，所以有幾位 Homburg 球迷都有去睇呢場波，仲掛埋旗係球場既另一面。FKP 無球迷組織，只係有幾條友整左枝旗，拎住個氣喇叭間唔中按下，除左有幾下叭叭聲，其餘時間都無打氣聲。
班作客球迷反而打氣足全場，無諗過大家今日咁有氣力。上半場可以話打氣聲完全無停過，半場時 Capo 發現作客區有面有兩位生面口既人，走過去搵佢地傾下計睇下佢地咩來頭，傾到下半場開波十分鐘後先返。Capo 失蹤時個個都係咁呼喚佢返黎 😀 到佢返黎既時候佢咳左幾聲，個個即刻跟住佢咳😂 果然絕對服從 Capo～～
有幾十位作客球迷因為落雨關係就走左去主看台度坐，大家成功做到兩個看台對嗌！我諗大家都係因為岩岩主場可以反勝 Saarbrücken 所以大家仲有團火去支持隊波。
完場前十分鐘，有位球迷突然提議一首新歌比 Capo，不過有句歌詞諗唔到唱咩好，另一位球迷就即刻提議左一句，大家就開始細細聲唱練下先，唱左幾次大家唱熟左就開始越唱越大聲，唱到完場洗大家腦等大家下場可以繼續唱。其中一句係 Schwarz wie Kohle, Weiss wie Schnee，意思即刻「黑如煤，白如雪」，黑白就係 Elv 既主色。 我聽到呢句時，一開始以為係 Schwarz wie Cola… 然後我諗，可樂好似唔係黑色架喎🙈
最後零比一完場，呢三分對 Elv 好重要，佢地作客成績不嬲都唔太好，所以贏得一場得一場！