德國西南地區聯賽 第十五週 SV Elversberg - 1. FC Saarbrücken Waldstadion an der Kaiserlinde 賽果： 2:1 (1:1) 入場人數： 7,721
星期六係今季主場最熱鬧既一場波，事關對手係曾經踢過德甲既 1. FC Saarbrücken （好多年前既事）。Saarbrücken 係 Saarland 既首都，亦都係呢個州入面最大既城市，人口係 Elversberg 既十倍。好多人問過 Elversberg 係邊，我話係德國西南部，然後人地會問，附近有咩大城市呀？講 Saarbrücken 既話就應該得德國人先識，講係 Saarland 入面又應該無人聽過呢個州。最後我只係話，近盧森堡囉，法蘭克福渣兩個鐘車左右啦，係法國邊境。
Saarland （讀音：莎蘭）係德國其中一個州份，位於德國西南，法國既邊境，人口大約有一百萬人。莎蘭曾經屬於法國，又曾經獨立過。係足球方面，來自莎蘭既球隊最勁都只係踢緊地區聯賽，包括 Elversberg, Saarbrücken, Homburg。不過係高組別聯賽都有唔少莎蘭人！你知唔知邊個現役德國國家隊球員係來自莎蘭呢？雖然莎蘭有唔同既球隊，但如果有一隊波可以上到德甲乙丙既話，全個莎蘭既人都會支持果隊來自莎蘭既球隊，唔再分你我，因為大家都要支持莎蘭係其他人面前威返次！
廢up 左少少歷史背景之後，要講返場莎蘭打比。話就話係打比，但其實大家都無咩恩怨，一來 FCS 既球迷覺得 Elv 只係一個小球會，完全唔當佢地係咩一回事，佢地都唔會叫呢場波做打比。二來 Elv 球迷又對 FCS 無咩特別反感，呢場「打比味」主要係來自傳媒既渲染。
關閉重建左一年既 Block C1 終於係今場波重開～ Elv 每季主場對 FCS 都會爆滿，我地兩星期前就已經要買定飛，等到球會確定 C1 會係 15 號重開時，我地要拎返原本 C2 張飛去換張 C1。C1 先係真真正正屬於 Elv 球迷組織 Horda Fanatica 2006 既看台！球迷整左好多新既門旗，等球員入場時高舉新旗造成旗海。當日開波前一路都落住毛毛雨，不過企位看台（包括作客區）全部都無瓦遮頭。作客區原本其實係有蓋，不過球會班主話「我地既球迷睇波無瓦遮頭，作客球迷都唔可以有！」，然後上季季尾就拆走左作客區既上蓋。 C1 一路因為工程進度太慢所以季中先黎重開，個頂未起好都要比啲球迷入場睇住先。希望佢地快啲完成重建啦！落雨睇波真係好慘架。。。
FCS 開賽前係積分榜上踢少一場，以兩分差距企係榜首，所以今場波對兩隊球隊都好重要，FCS 贏左就可以拉開榜首領先優勢，Elv 贏既話就可以搶返個頭位返黎。未入場前我地都無咩特別感覺，入到場後企係 C1 ，望住對面龍門後面既作客球迷，即刻感覺返哂黎！
作客球迷真係人多勢眾，我估成個球場入面超過一半都係支持客隊。佢地唔只企滿兩個作客區，係主看台果面近作客區都係一大堆 FCS 球迷，講聲勢既話 Elv 球迷真係無得比。不過近幾年 FCS 既 ultras 同打氣聲都越黎越差，今場波佢地只係靠人多先有返個勢！
開波八分鐘左右 Elv 後衛謝拉特上身跣低左，對面單刀射入。十分鐘後 Elv 靠自由球靚波追和～～～～差啲廿分鐘就叫到無聲。。成場波都好緊湊，好耐都無呢種投入感。球迷會係比賽時間唔中 fing 下旗，今場波有人係後面叫班球迷放低啲旗，唔好阻住佢睇波。班人擰轉頭望一望佢，就繼續 fing 旗。成個看台咁多位，阻住你睇波你咪行去第二度囉。呢啲大賽係好多人好有氣氛，但亦都好多突然球迷走入黎嘈生哂。
話說越黎越多球迷表示不滿 Kapllani 既表現，今場波領隊終於肯放佢去後備，用返個有衝勁既 Göttel 踢正前鋒。個分別真係睇到出黎，有好多波佢都肯跑多幾步追返返黎先製造到多幾個機會。下半場班球員都開始火，對面啲球迷係咪掟啤酒。。。大約80分鐘， Elv 係正我地正前踢入。。。成班衝哂落看台底慶祝！！！最後十分鐘要拎住平安鐘，不過 Elv 暫時係失球最少既球隊， 所以穩穩陣陣咁完場！！
完場後球員向各方球迷致謝，黎到 Block C1 時，球迷一齊叫球員坐低，班球員就好乖咁坐低等 capo 既命令：Gib mir ein H! (Give me an H)。大家就一齊大叫 “HHHHHHHH”。Gib mir ein U! UUUUUUUUU! 叫哂成個 Humba，大家就一齊跳起慶祝！！完場後好多人一路唱住歌離場。其實真係好少咁多氣氛，平時得千幾人入場，完場後啲人即刻四散。大家今日真係好開心～～～
完場後離開球場時會經過一間主場球迷好中意賽前賽後聚集既酒吧，今日有唔少 FCS 球迷都係果間酒吧飲酒（由此可見兩隊波既球迷真係無咩恩怨），經過班球迷之後，有人向我地身後掟啤酒。望返轉頭時已經唔見條友。。。。呢啲垃圾要掟啤酒又唔敢係人地面前掟，由果刻開始，我希望 FCS 下場開始輸波輸到季尾！！！
客隊球迷完場後行去隔壁鎮搭火車返 Saarbrücken，不過因為太多醉酒佬，火車車長拒絕開車，話要等警察黎到睇住班球迷佢先肯開車出發。