德國西南地區聯賽 第十四週 FC Astoria Walldorf - SV Elversberg Dietmar-Hopp-Sportpark 賽果: 0:0 (0:0) 入場人數: 400 (70 Gäste)
剛過去既比賽週末我地星期六朝早十一點搭球迷巴士由 Elversberg 到 Walldorf，車程連休息時間大約兩個鐘。
Walldorf 位於 Sinsheim 附近，好近 Hoffenheim 既主贊助 Sap 既總部，當然亦都近 Hoffenheim 既主場。Sap 既老闆叫 Dietmar Hopp ，佢旗下既球隊有兩隊波，就係 Hoffenheim 同 Walldorf 啦。
Walldorf 其實係 Hoffenheim 三隊，佢地收購同培訓一班年輕球員，制造機會比班友上 Hoffenheim 二隊再上一隊。佢地個球場曾經係 Hoffenheim 幾年前踢低組別用既球場，名為 Dietmar-Hopp-Sportpark，我估你而家知兩隊波同個老闆有咩關係啦。
呢隊波係德國盃第一圈贏左德乙既 Bochum，係月尾既第二圈會對德甲既 Darmstadt，係唯一一支能夠朁級既地區聯賽球隊。為左德國盃，佢地要搭臨時看台先可以容納到大約五千人。主場既球迷係我地對面，班 fan group 有自己既一個小露台，當我用相機 zoom 去影佢地幾張相先發現佢地全部都有老餅黎。呢場波似係比啲退休人仕入場 hea 時間咁。
唔知係咪呢排多波踢，班球員全部都無咩力去跑咁。個個等波到，又唔走位，肯走位時又走唔岩位。今季既 star player 係由德乙 FSV Frankfurt 轉會過黎既 3x 歲前鋒 Kapllani （早幾場作客 Kassel 時有提過佢），今季差唔多場場都正選，係入到幾球波，但完全唔可以靠佢踢單箭頭去攝位追波囉，佢連波都拎唔到，有幾好技術都無用啦。唔明點解佢今場可以踢追90 分鐘。唔識德文既人黎到呢場波，會聽到班作客球迷係咁 Kapllani 前 Kapllani 後，唔洗明佢地講咩都知佢地鬧爆緊條友！
另一位長期做後備既前鋒叫 Moritz Göttel，雖然佢係後備，但佢每次落場後困種積極衝勁令佢極之受球迷歡迎。每場都會有球迷叫佢個名，今場佢草皮都無掂過，個個都想知個領隊諗緊咩。
其實前面有好多機會，但成日甩波同把握力唔夠，換個肯追波既前鋒我估已經可以入幾粒。
和左兩場之後兩場得兩分，已經比另一隊死敵 Saarbrücken 係積分榜追過左，Elversberg 踢多一場得第二。下場波會返到主場對 Saarbrücken, 到時一定要搶返啲分返黎！