德國西南地區聯賽 第十三週 SV Elversberg - VfR Wormatia Worms Waldstadion an der Kaiserlinde 賽果: 0:0 (0:0) 入場人數: 1.210
又一個 Englische Woche，即係週中又有比賽啦，又要週中走返去 Elv 主場。不過今次唔同既係，我地平時係係 Block C2，呢晚我地要去 Block A2。
話說早幾場波有人向球證dum 火機，雖然場波無被腰斬，但球會都係有手尾跟。賽會罰左 Elv 五千歐元，加上要關閉 Block C2。企開 C2 既球迷就要行遠少少去同樣係企位既 A2 （C2 同 A2 中間相隔左個 VIP Block）。而作客球迷區就係係正 A2 隔離。好在 Worms 都唔係好多球迷，所以兩面無近距離衝突。
Elv 既主要球迷組織平時會係 C2 掛上好多支旗，但今場波去到唔「屬於」自己既 A2 就只係掛上一枝組織既大旗，同時去表達對賽會判決既不滿。雖然上星期六比班史特加迷搶走左個鼓，但 Elv 今日已經有返個新鼓啦！
上半場既氣氛都還可以，不過個鼓有少少問題，鼓聲唔係好出到黎。睇住太陽落山後就越黎越凍，好在跳下唱下可以暖返啲。作客區見到有班 ultras ，不過佢地乜都無準備，旗又無鼓又無。
下半場就越黎越靜，班球員踢得奇差，大家都無咩心機。（低組別聯賽既分別就係咁，踢得差就會好明顯無咩聲氣）最後悶和完場，走都走唔切，返去坐係火爐前面暖下個身之後，又要渣一個鐘車回家了。
下場會係作客 Walldorf，會坐球迷巴士到 Sinsheim。呢個城市有啲乜？就係人見人憎既 Hoffenheim。佢地既二隊都係同 Elv 踢緊同一個聯賽，但佢地黎緊既週末無比賽。Hoffenheimer 同 Elv 既死敵 Homburg 既球迷早排結左盟，即係話。。。有機會佢地會去 Walldorf 歡迎 Elversberg… 留名等食花生！