德國西南地區聯賽 第十二週 VfB Stuttgart II - SV Elversberg Robert-Schlienz-Stadion 賽果: 0:2 (0:0) 入場人數: 550 (50 Gäste)
岩岩呢個比賽週末又搭球迷巴士去史持加啦！我覺得九月尾同十月唔應該有作客史特加既賽程囉。九月最後一個週末係史特加 Cannstatt 嘉年華 (Cannstatter Wasen) 開幕日，加埋十月啤酒節（史特加人唔中意佢地叫呢個嘉年華做啤酒節，因為 Baden-Württemberg 州既人唔中意 Bavarian)，好多遊客都走去史特加，搞到史特加附近既公路都塞死哂。
最後我地係開波後四十分鐘先到。。。波飛竟然要 8歐！！！！無學生價，佢地一隊都無學生飛。呢隊波完全唔為學生著想。降班後既波飛仲貴過踢德甲果陣！
好在兩個入場都係下半場先出發，所以都可以話無蝕！有班史特加一隊既球迷會支持埋史特加二隊，不過佢地只會掛旗等球員知道佢地在場，打氣就無乜。
呢個球場係在史特加 Mercedes-Benz-Arena 隔離，其實就係一隊其中一個訓練場，所以連廁所都無。想去廁所點算？就係去大球場既廁所啦！佢地會開門比你出返球場，行去大球場果面去廁所。估唔到一個月後我地又黎返呢一度閘，去返同一個廁所。
今場大約有五十個作客球迷到場，不過主力打氣既就得十個左右。到場後打下鼓，出下聲比啲球員知我地到左，之後都無咩點特別打氣。場內除左果兩個入場都無咩特別事。場外就精彩了。。。。
完場後，大家收返掛起左既旗同鼓，準備行返去上巴士走人。出左球場後見到有大約四十個著黑衫既人係巴士附近，心知不妙，即刻叫大家跑。果四十個人隨即向我地衝過黎，負責拎鼓既果個人拎個鼓扔向衝埋黎既人，個鼓跌左落地，就比班人搶走左。同時驚動左班保安（當時附近無警察，因為佢地去哂 Cannstatter Wasen，亦無諗過呢場波會有事發生）。我地負責拎旗，同時亦都負上極大責任，所以我地一見到唔對路就即刻攬住箱旗衝上巴士收埋佢，再企係巴士門口，手持啤酒樽，準備有人想衝上黎搶旗既話就一野扑落去。
點解要咁樣保護啲旗？因為係 ultras 界入面有條不成文既規則：如果一個 ultras 組織失去佢地既旗幟（一係被偷，一係被搶），果個組織就要即時解散。要重新成立一個組織唔係一件易事，要諗名，要畫過新既旗（呢度啲旗唔係搵bannershop print 出黎架），所以點解我地咁緊張啲旗。好在最後只係無左個鼓，可以話係一樣唔太重要既物件。
襲擊我地既係咩人？咪就係史特加既球迷。襲擊原因？我地都唔係好清楚。我地估計三年前 Elv 踢丙組主場對史特加二隊時，有兩個史特加球迷走左入主場球迷既區域，當時有幾位飲醉左既 Elv 球迷用暴力掟佢地出去。可能因為咁佢地懷恨在心，三年後見我地得幾條友就想黎報仇。但呢啲只係我地自己估，亦有可能係班友食飽飯無野做想搵交打。佢地四十幾個人，我地得十個人，佢地竟然只係搶到個鼓，我地都算大命！
出事後幾分鐘左友就有起碼二十架警車到場，仲帶埋警犬，果幾十條友即刻走都走唔切，如果佢地比警察捉到就會被罰 Stadionverbot。警察問話半個鐘左右，就話既然無人受傷又無咩財物損失，叫我地可以走人啦。