歐霸小組賽 第二圈 FC Schalke 04 - RB Salzburg Veltins-Arena Gelsenkirchen 賽果: 3:1 (1:0) 入場人數: 48.374 (200 Gäste)
講呢場波前我想借呢個機會再講點解咁多德國球迷反紅牛。以後我有機會再睇任何一隊紅牛既話我都會 post 多次呢段野，等未睇過既人可以睇到，睇過既人又可以睇多次。
有睇開德甲既人都會留意到升班馬萊比錫，大家都知佢地係土豪，係德國犯眾憎，只係用左七年就連升四級上甲組，又話好多德國國家隊青訓都係來自呢隊波，但無人知道到底點解佢地咁乞人憎。而家仲要開季頭幾場都贏波，可能已有 Glory hunters 想話自己從小支持萊比錫。
成件事要由 11 年前講起－ 紅牛係一間來自奧地利既能量飲品公司，11 年前佢地收購左當時係甲組有七十幾年歷史既 SV Salzburg。當時球迷十分歡迎紅牛，因為呢間公司係本土公司，加上老闆又係奧地利人。球迷諗住有錢就可以有更多機會去踢歐洲賽。點知紅牛成功收購後，改左球會名做 Red Bull Salzburg，改左新會徽做果兩隻牛， 球衣顏色亦由原先既紫色改做紅白色。一開始紅牛仲想抹去 SV Austria Salzburg 既所有歷史，話隊波係新成立於 2005 年。原本 SV Salzburg 既球迷一班一班咁離開呢度唔再屬於佢地既球隊，自己去成立另一隊新既 SV Salzburg ，帶住球隊原有既歷史由最低組別重新開始過。同時亦有球迷留低支持 RBS，因為佢地覺得金錢可以為球隊帶來榮耀。
當紅牛係奧甲有成績後，就想係更多國家發展佢地既足球夢，現時有紐約紅牛，加納紅牛同巴西紅牛，最後佢地想搞埋德國。2009 年開始係德國周圍搵球隊收購，但德國既球迷見到紅牛點搞死 SV Salzburg，就知道比紅牛收購即係毀滅自己隊波，所以被紅牛敲門既球隊都因為球迷強烈反對而拒絕紅牛既收購。
最後佢地成功收購一隊 Leipzig 近郊無人識既小球會，買起果隊波係第四級別既比賽權，正式成立 RB Leipzig，因為德國足總禁止球會以商業名稱註冊，所以佢地只可以叫 RasenBallsport Leipzig（直譯：草地球類運動萊比錫）。佢地用銀彈係低組別聯賽屈機，上季係乙組所花既轉會費，多過其他 17 隊既總和。
唔好話咩佢地用好多本土球員，肯花咁多錢係年輕球員上好抵讚。其實係無球員想加盟呢隊波，佢地無得㨂先從年輕球員入手。佢地用高薪主攻收購年輕球員，因為年輕球員（加球員既屋企人）通常都向錢看。呢隊波唔係咩為青年軍著想，佢地只係想借足球去為佢地既能量飲品做市場推廣。
其他德國球迷對呢隊波恨之入骨，大家都接受唔到一隊無傳統無歷史又無恥既球隊存在係德國球壇。有唔少球員都公開批評 RB，對 RB 時拒絕同 RB 球員賽前握手。仲有報紙雜誌都寫臭 RB。
最近可口可樂推出左德甲球會特別版可樂，就係無 RB 份（唔知係因為大家都係飲品公司所以唔想 promote 隊波定因為佢地企係球迷果面啦）。
當然都有唔少人覺得佢地咁花錢係好事啦，所以佢地主場都仲有人入場睇德甲。 Leipzig 既傳統球會全部都只係係低組別比賽，呢個城市既人可以話餓波餓左好耐，所以有唔少人因為 RBL 踢德甲就去支持隊波。
德甲仲有另外三隊球隊都係 plastic clubs，包括 Wolfsburg, Ingolstadt 及 Hoffenheim。係某一個比賽週末，Bayern 作客 HSV 有 8000 位作客球迷，而 Ingolstadt 作客 Gladbach 只得 70 位球迷，連 Bayern 既 1% 都無。
講完一大堆野，係時候講返今場波。當我知道史浩克會對 Red Bull Salzburg 我就即刻話要買飛去慶祝 RBS 連續九年入唔到歐聯分組賽，同時要去反紅牛。 去睇波我通常會帶住一條寫住 Against Modern Football 既頸巾。今日就要帶多條藍色頸巾～ 渣左三個鐘車北上，係 GE 火車站泊低架車就坐地鐵去球場。上車時見到一位好面善既香港人，同行仲有另外三個香港人都著住史浩克既波衫，諗到落車我就去拍佢膊頭啦。果然真係見過幾次面既波友，世界真細小！然後大家一路行一路傾，佢地黎德國幾日睇四場波，今場係佢地行程上既第三場波。去到球場後，我叫佢地留意住呢個 page，然後我地就出發去北看台。
今次我張飛係北看台高層（Nordkurve），但其實一心已經諗住要潛入北看台低層。入到去見到北看台下面每個位都攝左張紙，即刻賽前真係會有 choreo! 原本諗住係自己個位等開波，個 choreo 睇大電視就算。點知去到自己個位後真係差啲喊出黎！部電視完完全全被條橫梁擋住左。我地即刻走去球場另一面（南看台）等球員入場。
今次呢個 choreo 首先將北看台分開兩半，一半舉字，另一半舉球會 logo。一開始佢地舉起字既一面寫住「SCHEISS」，另一半舉起裂左既紅牛 Red Bull Salzburg 會徽。
（好聽啲既翻譯就係：食屎啦紅牛！）然後 capo 既一聲令下，球迷逐漸將張巨型海報反轉，變成藍白既 「Vorwärts Schalke」，即係「Come on Schalke!」。史浩克開季連輸五場，一分都無，開波前 Capo 激動地叫大家就算輸左幾多場波都要一齊同心支持球隊！
德國既球迷好興同另一個看台互嗌，係史浩克呢度佢地首先會向南看台揮手，然後就叫 「Schalke」, 對面就會回應 「Nullvier (04)」。今次佢地做左一次球會名字既互嗌，然後諗住叫「Scheiss Red Bull」，點知南看台果面作出機械式既回應：「Nullvier」🙈 大家都笑左，然後北看台呢面再黎多次大聲啲既 SCHEISS RED BULL! 南看台終於回應返 Scheiss Red Bull！
今場仲有北看台既互唱，就係一半唱完（加fing 頸巾）到另一半看台唱。呢樣好似係上季佢地開始玩上癮，好開心今次我都有分參與！✌🏼️
完紅牛破蛋入到一粒，作客球迷放左紅煙，但完全無興趣影佢地相，啲旗又醜，人又少。仲有佢地球衣顏色係紅色加黃字，即刻聯想起大陸果啲蕃茄炒蛋海報。
完場後史浩克球迷去北看台向球迷致謝，球迷為球員鼓掌時同時叫佢地要繼續加油，提醒佢地班球迷會係佢地背後繼續支持球隊。
仲有樣野值得提既係 RBS 既會徽。奧地利無商業命名限制，所以隊波可以叫做 Red Bull Salzburg，會徽就係紅牛能量飲品果個 logo 再加 Salzburg 呢隻字。而 RB Leipzig 既名同會徽就唔可以用 Red Bull 兩字，會徽上得兩隻牛加 Leipzig。UEFA 既賽事都有好多關於商業既限制， RBS 既 logo 係 Uefa 賽事上變左同萊比錫一樣無左 Red Bull 兩個字🤔 不過又點解唔整走 Leverkusen 個 Bayer 商標呢🤔 唔知係咪因為人地有歷史呢🤔