德國西南地區聯賽 第十週 TuS Koblenz - SV Elversberg Stadion Oberwerth 賽果: 1:1 (0:1) 入場人數: 1.863 (25 Gäste)
係德國如果週中有聯賽賽事既話，佢地會叫做 Englische Woche （英式週），一星期要踢三場波。呢日 Elversberg 要作客 Koblenz。有踢開波既話都知週中九成九都係夜波，呢場波夜晚七點開波，係，收工就可以去，但呢度唔係香港呢。由 Elversberg 渣車去 Koblenz 要渣三個鐘，仲要預多一個鐘塞車。不過今次我地唔係由 Elversberg 出發，有直通火車個半鐘就可以到 Koblenz。
我地預早左一個鐘到火車站，然後行半個鐘到球場。Koblenz 幾年前踢德乙，降班之後破產，最後降埋落第五級別，今季先升返上黎地區聯賽。佢地既球場現時容納九千人左右，從客區望左有火車軌，望右有高速公路。
我地到達時客區有六個人，小食亭條友燒緊幾十條腸，好似預左會有好多人黎咁，好可惜最後得二十人左右。大部份人都要返工真係趕唔到黎。而主隊會打氣果班人都算多，但聽得出佢地都 hea hea 地，間中仲變埋圖書館。我地呢面氣氛就真係無咩，但上半場完場前一秒入波領先，大家下半場開始都有出下聲唱下歌打下氣咁。但 Elv 下半場越踢越漏氣，有幾球真係嚇死，最後都係比 Koblenz 攻破大門。
完場後，球員過黎逐一同到場既作客球迷擊掌致謝，仲話多謝大家山長水遠黎到支持佢地。失左兩分都仲保住到榜首位置，只好繼續努力。星期六主場再見！