德乙第五周 Karlsruher SC - FC Sankt Pauli Wildparkstadion 賽果: 1:1 (0:1) 入場人數: 14.686
星期日一早出發去 Karlsruhe 睇德乙，好天左咁多日，今日終於落雨啦。原本諗住好天既話睇完波可以係市內行下，佢既市中心係由城堡同花園做中心再以扇型發展，果個圈入面既建築都係向住城堡方向而建。 Karlsruher SC 既主場就係位於呢個圈入面，又係另一個係森林入面既球場。我地果區要行草地，踏下屎先去到個隱蔽入口。南看台呢面得流動廁所，但好在搵到路去另一個看台可以用佢地個廁所。
客隊係黎自漢堡既 St. Pauli，佢地既球迷坐企滿哂成個作客區。由漢堡落黎 Karlsruhe，我估凌晨就要出發。KSC 同 St Pauli 其實無咩瓜葛，但因為政見不同，所以比賽期間佢地都間唔中會大叫 Scheiß St Pauli。
KSC 既主球迷區同 Nancy 一樣，同球會買起左個看台，波飛由組織自己分發。不過佢地既看台分佈好奇怪。上面果區係 KSC 既 ultras，下面果區大過上面 ultras 企果區，佢地既右面企位又有一堆會一齊打氣既球迷（估計係因為入唔到組織既看台所以只可以企係附近），所以即使佢地有好多人，聲量太分散令到打氣聲唔係特別大聲。
KSC 呢個森林球場有唔同既野食，有豬扒包 （Schweinesteak），佢唔係好似澳門既薄豬扒包咁，而係一塊厚切bbq 豬扒，燒到岩岩好，塊肉一啲都唔難咬，可以加茄汁或者 Salsa，完全將其他 Stadium food 比下去！！！！雖然個豬扒包比較貴 （4歐），但佢又大份又飽肚又好食，我覺得係抵食既！（聽講 Elversberg 踢德丙果年都有豬扒包，所以請大家同我一齊祝福佢地今年可以升班，等大家有多個球場可以食到豬扒包！！！）
作為一個花生右，睇呢場波睇到勁勞氣，幾乎每分鐘都有死球，差啲以為自己睇到美式足球，每分鐘停一停要去廣告咁。客隊 Pauli 先開紀錄，主隊其實有好多機會，但把握力奇差，比佢地下半場追得返都算係咁。