法甲第五周 AS Nancy - FC Nantes Stade Marcel-Picot 賽果: 1:1 (0:0) 入場人數: 17,034
星期六睇完 Elversberg 就即刻趕去法國睇我人生第一場法甲！法國既高速公路全部都係收費既，所以我地要行小路，經過農田同小鎮，唔洗兩個鐘就到 Nancy 啦！
Nancy 係今季既升班馬，係 Nantes 既死敵，所以兩隊波以前都無咩機會碰頭！我地見到個賽程就計劃要去呢場波，上網睇買波飛竟然要40歐！！！我地就諗住等下先，因為我地識人有機會問到平飛，賽前幾日佢話有飛！可惜客隊有班球迷被禁止入場，所以全部都決定杯葛呢場波。
賽前要去球場外「買飛」，要去一個人架車度買，盛惠5歐！ 😎 我望下張飛，上面無寫價錢。原來 Nancy 既球迷組織 Saturday FC 同球會「買」左個看台，等佢地可以控制咩人可以入到個看台，看台亦名為 Kop Saturday FC，波飛價錢由組織自定，我地得到既係友情價！
入場後見到對面有另一個球迷組織既 Banner, 發現 Nancy 係有兩個「 Kop」，一個係 Saturday FC, 另一個係 Schuth。 Schuth 係由 Saturday FC 分裂出黎，兩班人無話憎大家定點，只係大家意見唔同，最後各行各路。
賽前有 choreo, 不過我地同佢地同一個看台所以乜都睇唔到。一開波佢地就不停唱，唱到完場無停過。佢地個光頭 Capo 戴黑超渣咪（唔係大聲公！），好似啲 Hip hop 歌手咁😂 叫佢地唔好睇場波，專心打氣。佢地專心到好似連失波都唔知，對方入波後佢地都係照唱歌。下半場佢地追得返一球都算係咁。完全唔知呢兩隊波踢緊乜，無組織無策略，唔怪之得兩隊波都得果幾分。
氣氛黎講我覺得都幾正，佢地真係唱住歌咁唱足全場，但我覺得爭咁啲霸氣。德國啲球迷都會唱（叫）歌，佢地會有好大聲好震撼既一下咁叫出黎，不過呢日係 Nancy 就無。唔知係咪因為佢地既 Fanscene 比較細，所以無咁震撼🤔 仲有啲好多球迷既衣著係唔關隊波事，有人著利物浦有人著車路士，有人戴 LV cap 帽，有人著到成個紳士咁。法國人啲 fashion sense 係唔同啲😂
完場後啲人散得勁快，五分鐘後個看台已經無人咁濟，半個鐘後就比人趕走。回程時要渣返啲鄉村路返黎，好恐怖！方圓十里一盞燈都無，路邊又無反光柱，又要驚啲動物會跳出黎🙈 啲路又好多高低起伏，好似過山車咁去到頂就睇唔到前面係點，好驚架車會飛起🙈 德國啲路每二十五米會有條反光柱，啲路佢地會整平佢等你睇到前面。 都係德國好！