德國西南地區聯賽 第九周 SV Elversberg - SSV Ulm 1846 Waldstadion an der Kaiserlinde 賽果: 2:1 (1:1) 入場人數: 1.530
未開波已經知道另外幾隊競爭對手都失分，今場贏波就可以拉開三分繼續企係榜首。同時大家都有程不祥預感，呢啲情況通常自己隊波都要輸埋一份。。。
對手係升班馬 Ulm，佢地之前因破產降班，而家又慢慢升返上去。開波兩分鐘 Elv 就領先，氣氛好好，可能知道隊波而家位於榜首所以大家都好熱血。場波其實踢得唔錯，但呢三分得來絕對唔易。
完場前兩分鐘，Elv 得到角球，啲球員諗住拉下布咁係角球位置浪費下時間，球證就比左黃牌，球迷就當然鼓噪，呢啲都正常。點知我地附近有人向球證dum 火機，個球證即刻叫停場波，話要驗傷。 其中一個 Elv 球員走黎鬧我地問我地做乜春，我地話唔關我地事，係隔離啲人。不過果陣佢地唔會聽。
呢個情況下，球證可以腰斬比賽，咁對方就會自動判贏2－0。看台上面兩班球迷係度鬧交，因為我地全場係度打氣，有機會就係比醉酒佬一個火機就浪費球員同球迷呢八十幾分鐘既汗水。果廿位作客球迷呢個時候都執好哂野諗住走人，佢地諗住場波會終止。呢啲事其實唔常發生，因為德國既球場看台通常都同球場有一段距離。呢個球場就好似英國球場波，球場草地隔離就係看台。有好處又有壞處吧。。。
過左三十分鐘， Elv 既領隊出返黎，叫大家埋位，意旨比賽將會繼續！其實大家都有啲驚訝場波會繼續，不過點都好啦，最後有驚無險得三分。
平時完場後，球員會去球迷面前致謝。當日球員一開始打算直入更衣室。球迷即刻嬲到爆，叫佢地過黎。最後佢地都走左過黎鼓掌。有幾個球迷嘗試去同啲球員解釋，佢地聽唔聽到又另一回事。
因為咁樣搞下搞無左半個鐘，完場要即閃去睇另一場波～