1. FSV Mainz 05 - AS Saint-Étienne Stadion am Europakreisel Endergebnis／賽果: 1:1 (0:0) Zuschauer／入場人數: 20,275 (700 Gäste)
中秋節快樂！呢日係 Mainz 史上第一次出戰歐洲小組賽，對手係有球迷文化既法甲球隊 St Etienne。諗住到時個球場會爆滿，點知最後勁多吉位。波飛其實都唔算貴，最平19歐一張「企位」 （Uefa 歐洲賽事只可以有坐位，平時既企位看台都安裝座椅，不過球迷都係照企），但另一個龍門後面都只係20歐一張，不過都係坐唔滿。
當我地到達 Mainz 主場 Stadion am Europakreisel 出面條馬路時，前面突然間封路，即刻燥底，因為睇唔到前面做咩事。之後有十幾架警察係對面線駛過黎，一堆防暴警察係橫街行出黎。。。心情即刻大好，因為咁既場面即係代表有球迷遊行緊過黎。果然係一大班作客球迷唱住歌咁行緊去球場！！！佢地一路拍哂手咁唱「Allez, Allez」，啲警察係咁話啲球迷好激進，叫我地退後啲。但佢地好似開緊party 咁，個款都唔似想搞事住。等佢地行哂之後就終於開路比我地行！
呢個咁既球場，附近係農田同爛地。。呢個新球場都開左幾年啦，但附近啲基建都仲未搞掂。去到球場拎飛時，佢地送左兩頂帽比我地。一面印住 Mainz 05 ，另一面印住 Europakapp。 Kapp 係德文口語指 Hat ，個音又似英文既 Cup，讀出黎就係 Europa Cup。 Mainz 係一個好出名既嘉年華城市，所以 Europakapp 個 logo 係一個好似嘉年華帽咁既野，將歐霸同城市特色結合～
說我帶左兩盒月餅黎德國，就係諗住中秋當日賞月食月餅，所以帶左兩個月餅諗住係球場食，但又唔知比唔比帶入球場。安檢前拎住係手，諗定好解點解釋比佢知，點知佢望都無望過果兩舊月餅就可以過關。
入場後就已經望到主場球迷區已經掛起哂 Choreo 準備球員進場時打開。每個座位上面都放左一塊大卡紙，以為全場都整choreo，點知原來呢張卡紙係比球迷摺成一把扇狀既物體黎打氣，係電視睇可能氣氛會好似好正咁，但對我黎講完全係折磨緊我對耳。呢舊野唔洗用力都已經好大聲，所以有啲人勁大力咁拍，又啲人又係又拍唔係又拍！！！！😡 好彩附近無細路咋，我見到隔離個看台啲細路瘋狂咁拍果把扇！！
球員入場時，主場球迷打開 choreo，看台上變成巨大既 Mainz 會徽，台下寫住「Internationale Fussballsportverein」，指出佢地終於衝出國際啦！同一時間，作客球迷點起 pyro 搶風頭。即刻唔知個頭望邊面好！
場波一啲都唔悶，啲攻勢都幾到肉。希望客隊快啲入幾粒，等啲主隊球迷無心機再拍。最後開齋先既係 Mainz，有入球睇即刻一齊慶祝埋一份，因為 d ultras 都即刻大聲左！最後客隊追和 1:1 ，最後兩隊各得一分完場！
係球場入面望唔到月亮，但離開時就見到光到好似大陽咁既月亮！請原諒我無影相技術同埋唔想行去老遠攞靚景，所以我求其影球場一角加個月亮就算啦