德國乙組聯賽 第四周 VfB Stuttgart - 1. FC Heidenheim Neckarstadion 賽果: 1:2 (0:0) 入場人數: 52.200
老老實實， 客隊Heidenheim 雖然踢德乙，但我真係對呢個名無咩印象。今次㨂睇呢場波係因為呢場係打比戰，兩部波相隔車程只係一個鐘左右。正確黎講又唔可以叫打比，因為今場只係兩隊波有史以來第一次對賽，無咩瓜葛下無打比既火藥味。最後一個原因就係當日係史特加既123 週年！諗住咁多野加加埋埋，應該會有啲好睇既 choreo，可惜最後得客隊既一個小 choreo.
當日我地下午就到史特加市中心食午餐先，去南部一！定！要！食！ Spätzle！同 Maultaschen！有位德國好朋友之前試過親手由麵粉搓 Spätzle ，再同洋蔥加芝士一齊焗，好好食！又試過係超市買現成既自己煮，不過口感差好遠。今次第一次黎到史特加，一定要食當地特色！Spätzle 係好似意粉咁既麵類，不過係一粒粒／長條型咁。 Maultaschen 就係好似雲吞咁，入面包住綠色既肉。相傳以前啲人齋戒時想食肉，就發明左個方法整到啲肉變左綠色，再包住佢黎煮，咁就無人知佢地偷偷食肉！
食飽後就係市中心行去火車站，Heidenheim 既球迷會搭特別火車到史特加，所以諗住睇下有無得食花生。去到火車站一個警察都唔見，就知佢地應該唔係係大站落車。
史特加有另一個中心叫 Cannstatt，每年開季前啲數以萬計既球迷都會同聚集係 Cannstatt 儲氣為新球季作準備 （有興趣可以睇下：https://www.youtube.com/watch?v=szmpbYsFnbM ，如果條 link 唔 work，可以去 Youtube search Stuttgart Cannstatt）。由 Cannstatt 行半個鐘左右就可以到史特加既主場，所以唔少球迷都會係比賽日係果度聚集。主場球迷既看台亦都係叫 Cannstatter Kurve。
史特加個球場好大好靚！Heidenheim 既球迷果然有準備 Choreo，開波前作客區變左紅白藍，相反主場球迷就無咩特別準備，只係有條 123 Jahre Tradition banner。比賽時主場球迷仲有唔少 Banner 去抗議球會現時既運作方式：大財團係球會既操控權越黎越大；對新「當選」既主席不滿，估計呢位主席應該係球迷無份選出黎。下半場 H 開齋先發現原來呢面看台隱藏左好多作客球迷（其實唔少都光明正大作住客隊波衫），佢地入波時好多人彈起慶祝，仲有個小朋友特登走埋黎去到朋友面前慶祝！好快史特加就追和，但追和無耐又比 H 入波超前，最後 1:2 完場。估唔到 H 第一次黎到就可以拎走三分，聯賽榜上仲爬左史特加頭！
史特加既球迷唔知點解好中意 Großkreutz。作為一個史浩克迷，對佢完全無好感，佢被換入時全場竟然企起身鼓掌。條友又蠢又唔係特別好波，佢做得最好就係公開反萊比錫。
仲有就係，唔好唔記得呢場係德乙波，同埋係星期五晚，都仲有好多人入場！史特加岩岩係德甲降班，球迷大可以話「車，德乙有咩好支持呀，放工返屋企抖下仲好啦」就唔去現場，但入場人數都仲有五萬。