30.08.2016
德國西南地區聯賽 第六週
FC Homburg - SV Elversberg
Waldstadion Homburg
賽果: 0:2 (0:1)
入場人數: 2.186

Derbysieger! 今場係 Saarland 打比，兩個城市相隔只係二十分鐘車程。呢個球場得流動廁所，會否有點落後？？？主場既fan group 開波前廿分鐘先到場，同上場德國盃對史特加完全係兩個樣。上半場好似發緊夢咁唔知做緊啲咩，完上半場前幾分鐘又入左球好鬼異既波，大家一開始係靜左，然後「Ja?」 （解 Yes, 德文既 j 係好似英文 y 既發音咁，即係讀“Ya”」，見到球員慶祝先 “Jaaaaaaaaaaaaa”，再爬哂上圍欄慶祝。

話說係 Saarland 睇波一定要食果度既 Stadium food，因為佢地既野食係即場燒烤架！！！唔似其他地方既球場用油煎野食。每次我都要食返個 Frikadelle （好似漢堡包咁既野，有機會再介紹），只需 2.5歐就搞掂左晚餐！開心完左半場後就到驚險下半場，客隊領先緊所以啲球迷都好歡樂，最後竟然仲入到多一球cushion 波就更加歡樂～～ 主場球迷一見落後兩後就即刻走人，其他人走都算啦，連班 fan group 都收旗走佬，真係接受唔到。抵佢地聯賽榜排第尾！

上場Homburg 主場對史特加見到主場球迷竟然掛住塊賀芬咸 fan group 既旗。有睇開德甲應該都知好多人都反賀芬咸，因為佢地係一隊用錢買個位返黎同無歷史既球隊。好多德國球隊既球迷都同其他球隊有聯繫，佢地叫「 Fanfreundschaft」(Fan friendship)。史浩克同紐倫堡既球迷就係其中一個例子，史浩克既球迷有時會去幫紐倫堡打氣，係紐倫堡紅海入面你會見到有人著藍衫，就知佢地係去助陣。仲有一種更明顯既支持方式就係掛對方球會既旗係你既 fan block 上。今次 Hom球迷掛左賀芬咸既旗成為左一個笑話，因為無其他球迷會想同一枝無歷史又只得錢既球會建立友誼聯係。

今場波有唔少警察係場外內戒備，以防有球迷生事。完場後有主場球迷拍打作客球迷既巴士，不過因為有警察在場所以無咩事發生。幾年前試過 Homburg 既球迷輪波唔服氣，去到 Elv 市中心等球迷巴士襲擊佢地。但聽講今次 Hom 既球迷係 Elv 球迷返哂屋企先去到 Elversberg，最後咩事都無！